Photostudio 1552753591312 960x480

كوميديا سوداء‖لقاء لشبونة بين الوفد المغربي و كوهلر...مفاوضات كاني ما نبغيك ادكدك صيكاني

Sahara negociations

الداخلة بوست

بقلم: الأستاذ براهيم سيد الناجم

گط كتب عليا مولانة عني نترأس وفد رفيع المستوى للتفاوض سنة 2010 بمنطقة گراير المحنك شرق مدينة الداخلة،و ذاك العام معروف عند أهل البادية بعام اگديم ازيك و هو عام معلوم مشاء الله،هذا الوفد كانت مهمته هو التفاوض مع شيباني حول (گرارة) من ذاك لگرار،گامت عليها ديگة كبرها مولانة مبينو هو و شيباني ثاني،گام الشيباني لول و احتجز أغنم الشيباني الثاني بتهمة عنها دخلت گرارتو و كالت عليه شي من ازرع حارثو،و عاد اطالب الشيباني الثاني عنو اخلصو بروس من لغنم اياك يعطيه الثاني من غنمو.

سبب اختياري انا رئيسا للوفد عني يبرا واحد من النخبة اللي تگرا فالتل،و اللي مكبرا فيها الكرش و مطلوب منها الحل لجميع المشاكل سواء الصحية او المالية او الاجتماعية او الميكانيكية،بيها منين "تنفر عنز اگولو لك رومها،ومنين ما تگد اگولو لك گرايتك انت ذي بلا فايدة"،ومنين تخسر "االوتا" ولا تعرف تعدلها اگولو لك گرايتك انت ذي بلا نتيجة،ومنين يفرغ بوش گاز اگولو لك عدل لو طريقة اياك يگدي الكوزينة و منين ما تعدلها اگولو لك يا فظيمة فيك گراية.

ترأست انا الوفد رفقة خمسة اشخاص أخرين أكبر مني سنا،و بكرنا شور الشيباني و جبرناه فخيمتو،و سالمنا معاه و گلت لو انا بطريقة الدبلوماسية الناعمة"حنا يالداه الا أخبار الخير،جايينك نطلبوك يكانك تطلس لنا "گلفة" فلان،ما حاناني نوفي كلامي،گالي "گلت لك انا ذاك لجايبكم نعرفو ولاهو خافي عليا ،بيكم لماگط جاني واحد منكم سابگ اليوم ولا لهي اعود انزل عليكم"وحي الهداية" بين ليلة و ضحاها قطعا،و فلان لعاد ادور نطلس لو غنمو لهي نگبظ منها "عنزين و حولية".

خرست انا ذا هو اللي الشيباني راسو گاسي،گلت لو انا لهي نعطيك منها"عنز" خلاص ازرع،و ذا راهو اعاقب عليه القانون و الفصل الثاني من الدستور و المادة 30 من القانون الجنائي و قانون الإستثمار و و و و،"گالي" ذا الحزب اللي تعرظ عليا أنا خليه الين تجبر حد يفهمو ولا حد يؤمن به،هون لخالگ الا ذاك لگلت لك و لخبار وافيا،ايوا گلت لو لهي نعيطو "لجدارميا" گالي عيطو گع "لبطرس غالي" ذاك لشور امريكا.

باءت المهمة بالفشل للأسف،و انسحبت انا و وفدي الرفيع،و سلمنا المهمة لوفد أخر مافيه حد "گاري بعرة" و فاليوم الموالي عطاهم الشيباني "گلفة لغنم" ما زاگلها راس واحد و الاكثر من ذاك ظل ذابح لهم و جيرات اللبن يتعاگبو عليهم و حنا ما زگل علينا كاس من اتاي گاسي.

رغم فشلي فالمهمة اللي حطم معنوياتي،و بعد ما شفت الوفد اللي فالصورة ارتفعت معنوياني و عدت مسنعد مرة ثانية لقيادة وفد تفاوضي من جديد و بطرق دبلوماسية عصرية كيف اساتذتنا الكرام الخبير في علم البحار السيد هامدي گابرييول الرصيد و الخبير في تفسير الأحلام السيد الكطاط صيبصتيان يونجا.