گاليك التصالح مع الذات..السي الخطاط ينجا التحالف يخ منو وعيني فيه!!؟

المركز الأطلسي الصحراوي للاعلام و أبحاث مكافحة الفساد و تحليل السياسات 

شحال عجبنا الكلام ديالك السي الخطاط وأنت تهضر بثقة مع كوايرية السياسة فهاد لمدينة لعزيزة علينا، طبعا هاد الشي كيفرح فين ولينا فزمن التوافق والتفاهم وسالا زمن التلاعب بالمواطن والاستغلال ديالو فهاد لمطاحنة ديال السياسيين اللي خلاتنا ديما اللور،،، 

ولكن السي الخطاط فين تهضر على التفاهم والمصالحة وانت كتكول الانسان اراجع راسو، را خاصك بعدا تعترف بالتحالف كلو وتعتذر للحاج صلوح الجماني وتطلب من النكافات ديالك اسالو التهكم والهجوم عليه في الصفحات والمواقع لي كنت كتدعم،،، 

ثم السي الخطاط خاصك تسالي هاداك الحقد مع مونا شكاف، لأنها اولا بنت عمك وسيدة عندها وزنها العائلي والقبلي والسياسي، وإنسانة لي كتنتمي لحزب وقع على التحالف الثلاثي ديال الحكومة، ،اه نسيت،، انت السي الخطاط خاصك غير التحالف مع الاحرار اما البقية خاصك تستغل الصراع معاهم باش تبقى هاديك الثنائية ديال الخير والشر ديما كاينة، ويبقاو النكافات كيخادعو المواطن بأنك انت هو الخير المطلق والجماني ومونا هوما الشر المطلق،،، 

ايوا السي الخطاط هادا را المغرب بلاد الخير والامن والمؤسسات، وخاصك تحتارم التحالفات لي كاينة وتلتزم بها وتبقى في حدودك لابغيتي رجليك ما يهربو من الجهة، لانه الجماني هو اهم عنصر فالتحالف ومونا بيها كمل الصلح بين الاحزاب لي انت جيتي كتسعاهم باش اخلوك رعيس على الجهة،،،،

بس : بلاتي ياك انت هضرتي على مراجعة الذات والتوافق وصلة الرحم، ورينا الله يرحم اباك حسن النية ديالك، ودير شي زردة فاعلة تاركة ودير ترضية تليق بمحمد بوبكر اولا لي خنتيه وخنتي هدوك الشيوخ لكبار لي توجهتي عليهم فين لقيتي راسك لا بابا لا نعايلو، او سير عند الشيخ اعمار لي جريتي عليه بعدما صنع منك رئيس وحاول ترضيه هو لاخور باش ما كان، وما تنساش كذلك السي المامي بوسيف لي جار ديالك اولا، وثانيا هو اللي كيرجع ليه الفضل في انك اليوم وليتي مشهور بعدما سمح فكاع الاغراءات ديال 2015 وعطاك الجهة على بلاطو مزوهر،،،

بلاتي مزال القائمة طويلة، ما تنساش الله يحمباك واحد السيدة مثقفة وشخصية نسوية شابة اللي راها معاك دابا فالمجلس غتقتلك بالفقصة، واللي العائلة ديالها رداتلك الصرف ديال الطرد ديالها من الحزب فالغرفة الفلاحية، وحاول تا هيا ترضيها وتصلح معاها هاداك الديفو العظيم لي درتي ليها، لأنه الانسة غلا باهيا ماشي شي حاجة ساهلة، وغدا غتوريك لعلايات علاش كادات فالمجلس الجهوي،،،،

ما يمكنش نفوتو عاوتاني واحد السيد الله اعمرها دار وهو الدكتور ماء العينين محمد لغضف لي كان معاك فالحزب، واللي العنصرية ديالك منعاتك من انه تقدر القيمة ديالو والاخلاص لي عبر عنو سنين هذي وهو معاك فحزب الاستقلال وتا بلاصة فاللوائح ما خداها،،،،

السي الخطاط ما تحشمش وكون قاد على الخطوة لي درتي، وعرف باللي الرئاسة عندها الثمن ديالها، واحتارم التعهدات ديالك ولو لمرة وحدة فحياتك، لأنه السي امبارك حمية ومحمد لمين حرمة الله را ما كيلعبوش، وإلا كنت كتحسب بأنه تقدر تديهم لصفك بلا ما تدي الجماني ومونا وبوبكر فأنت غالط وما كتفهمش فالسياسية، لأنه اليوم غيلعبو هادوك ولا ما غيلعب تا واحد، وايلا كان هدفك ان النكافات ما يكعاوش حيت انت درتي ايدك فليد ديال إقطاعية الكهوف حسب وصف مفتش الحزب ديالك و لي كانو يقصدو بيه ،الجماني، فعادي انت كتعرف فنون تبدال لوجه احسن من كاع السياسيين فهاد لمدينة وبدل وجهك وحيد هديك الشخصية الصالحة الشريفة لي كتمثل الخير كلو فهاد لبلاد،،،

بس : السي الخطاط باراكا من سياسة جوج اوجوه وباركا ما تحاول توصل لينا هاديك اللعيبة ديال *عيني فالاحرار او يخ من الحركة والاصالة*، وشد النكافات ديالك وقول ليهم يلتازمو الحدود ديالهم مع الحاج الجماني والحاجة مونا شكاف، وايلا كنت كتلعب بهاد اللعب الباسل، وكيحساب ليك واااعر مع راسك، فرا السي امبارك حمية غيندمك على اللعب بهاد الاسلوب، وعرف راسك مع من كتبورد،،، 

مودتنا،،،