رئيس مجلس الجهة…فين الشباب ها هو ، فين الجمال ها هو!!!!

المركز الاطلسي الصحراوي للاعلام و أبحاث مكافحة الفساد و تحليل السياسات 

أغنية قطار الحياة للمطرب المغربي الكبير عبد الهادي بلخياط تعتبر من روائع الأغنية المغربية اللي بقات محفورة في ذاكرة جميع لمغاربة خاصة جيل السبعينات و الثمانينات. هاد الأغنية اللي بعض مقاطعها كتقول: قلت لك أنا كنبغيك ، أنا فين و أنت فين،فين الشباب ها هو ، فين الجمال ها هو ، كنظن بأنها كتعجب السيد رئيس مجلس الجهة ديالنا و كيطبقها حرفيا و أخا لوقيتة اللي كانت دايرة البوز فالمغرب هو كان كيتغنى بالأغاني الثورية بحال يا فرنسا قد مضى وقت العتاب ، و نشيد أنا الرفيق المستحيل.

الرئيس ديالنا عزيز عليه الشباب و شفنا كيفاش خلال الحملة الانتخابية كان محاط بكتائب من الشباب ، و كيفاش كان عزيز عليه إبان أمام عدسات كاميرات الهواتف النقالة محمولا على  الأكتاف مقلدا بذلك صور قادة الثورات في جمهوريات الموز.

اليوم فواحد الاستقبال تم نشر الخبر ديالو على صفحة مجلس الجهة ظهر السيد الرئيس المحترم رفقة رئيس المجلس البلدي بمعية مجموعة من الشباب المنضوي تحت لواء منظمة الشباب الأوربي و الافريقي القادمة من مدينة ستراسبورغ الفرنسية.

حسب موقع مجلس الجهة اللي قام بنقل الخبر الهدف من هذا اللقاء هو مناقشة العديد من القضايا المتعلقة بالجهة و خاصة الشباب و دورهم في المشاركة السياسية و الاقتصادية باعتبار الشباب مستقبل الغد.

لكن الغائب الأكبر عن هذا الاجتماع هو الشباب ديال الجهة، بغينا نشوفو غير شي شاب كنعرفوه من غير رئيس المجلس البلدي اللي حاضر بالصفة التمثيلية ما لقيناه.

كيفاش بغينا نهضرو على قضايا الشباب و هواة السياسة ديالنا عندهم حساسية من الشباب و الدليل على ذلك هو تغييبهم في المجالس المنتخبة و الحرص على تغييبهم من هاد النوع من اللقاءات و أخا غير من باب الدبلوماسية و المجاملة.

السيد الرئيس المحترم و صاحب النظرية الجديدة في السياسة و التي سيتم تسجيل براءة اختراعها باسمه و هي نظرية المكونين، يتعامل بمنطق الغاية تبرر الوسيلة، و بالوصول إلى كرسي الرئاسة لم تعد هناك حاجة لتبني خطاب إشراك الشباب.