في إنتظار تدخل والي الجهة||وا السي رئيس المجلس البلدي بارك من لعب الدراري و ضبط الامور …اراه عيقتو…هذي اراه ولات رحيبة!!!؟

المركز الاطلسي الصحراوي للاعلام و أبحاث مكافحة الفساد و تحليل السياسات 

من المضحكات المبكيات هو أن تدخل عالم السياسة و أنت ما بينك و بينها غير الخير و الاحسان و زايدها بالسنطيحة و لفهامات الخاوية.

شي وحدين غادي أكولو لي راه غير الشباب و عندهم شوية ديال الحماس و الغيرة على المدينة، و لكن باش توصل بك الوقت تكول لشركة أوزون ديري خدمتك و الا خليوني نشد شطابتي و نشطب مدينتي بيدي، و بزاف هادي على الحماس و الغيرة.

خاصة و أننا راه عارفين النهار اللول شكون اللي نفخ ليكم الكرة باش تلعبو و بانت من التحالف اللي مشيتو معاه، حيت نظرية المكونين الجديدة فالسياسة ديال رئيس الجهة و زعيم مجلس اللوياجيرغا هي اللي خلات شي بعضين يوصلو لشي بلايس ما كانوش تيحلمو بها.

دابا خلينا غير فالتدوينات ديال واحد الحزب سميتو المحراث بغا يحرت السما و الأرض بحال هاداك خونا حرياط اللي كيقلبو عليه صحاب الحال.

واش فراس الشباب المتحمس بأن رئاسة لجنة المرافق العمومية لا تعطي الحق من الناحية القانونية لرئيسها بأن يسير مرفق النظافة دون تفويض للإختصاص من صاحب الاختصاص الأصيل الا وهو رئيس المجلس الجماعي.

واش فراسو بأن أي مستشار جماعي سواءا كان رئيس لجنة أو غيرها لا يمكن أن يمارس مهام غير مهامه التداولية سواء داخل اللجنة أو خلال اجتماع الجمع العام و التي تقتصر على تقديم الاقتراحات و التوصيات و مناقشة النقاط المدرجة بجدول أعماله و اتخاذ مقرر بشأنها من خلال التصويت بالرفض أو القبول.

إذن هاد الدعوة لمالين الدجاج و هاذي التكعسيسة فكرسي بالمرآب الجماعي ما محلها من الإعراب، و ما هو دور رئيس المجلس الجماعي.

و حنا كمتتبعين و فاعلين فالحقل السياسي بغينا نعرفو واش حزب المحراث ولا ناطق باسم مؤسسة منتخبة عندها قنواتها الرسمية للتبليغ ماشي صفحات على الفيسبوك.

و هنا دعوة للسيد الوالي المحترم لمين بنعمر اللي كنعرفو بأنو رجل قانون و صارم و لا يحابي أي طرف باش يضبط الايقاع شويا و يفرض احترام القانون و اختصاصات كل واحد، ما دام السيد الرئيس ما عندوش التلكموند و مخلي كلشي يلعب فتيرانو.

أنا بقاو في غير دوك أمالين الدجاج و أخا ما شفناش الوجوه المعروفة و لكبيرة فلمدينة، واش غير اللي عيط ليهم إجوه. 

و علاش زعما أمالين الدجاج بالخصوص، حيت راه كاين واحد المقترح واعر عندو علاقة بالماكلة ديال لكلاب و شي محمية ، المهم شي حاجة بحال داك الشي اقترحوه الاخوان.

المهم أو خلاص اللي ذا أولو الله يحكم فاعكابو.